今個星期踏入國際賽期，睇一睇德國份名單無乜驚喜，加上又早早出咗線，不如繼續講下車路士今季大家都覺得佢進步咗嘅尼高拉斯積遜。
今季尼高拉斯積遜嘅入球率的確唔錯，先從預期入球值（xG）睇，上季xG有18.6，只係入得14球，而今季xG達6.23，就啱啱好入到6球，以呢個指標嘅埋門能力可以話有進步，今季有兩至3個入波都係望到佢嘅埋門觸覺，包括對韋斯咸同利物浦嘅走身後突破對方防線，再把握單刀射入。
不過積遜依然未有改變戰局嘅能力，當缺乏供應嘅時候，就會覺得佢消失咗咁，今季佢主力加強支點能力，季初對住弱隊嘅時候，經常可以彈一腳就立即走身後，但喺護波方面，對住利物浦同埋阿仙奴等強隊嘅時候，就會呈現不穩，因為佢經常被對方中堅中斷同中場夾擊而失去控球權，背身能力不足仍然係佢要改善嘅地方。
「新魔獸」要成為英超聞風喪膽嘅前鋒，仲係有一段距離，唔可以只靠速度搵食，往後遇上強強對碰，都係時候要把握機會證明多啲自己。Willhappy
