歐聯另一場搶分戰，巴黎聖日耳門主場迎戰馬德里體育會。ＰＳＧ雖然喺法甲保持強勢，但喺歐聯賽場戰績一般，頭3輪1勝1和1負暫居中游位置，急須爭取勝仗提升排名，今場係好機會；馬體會近況不穩，喺西甲連場失分，喺歐聯亦僅得1勝2負，包括作客賓菲加淨吞4蛋，表現遠遜預期，加上ＰＳＧ近5場歐聯對西甲球隊4勝1負，主勝睇高一線。
（Now 643周四凌晨4時直播）
巴黎聖日耳門今季進入「後麥巴比」時代，表現難免有起伏，但主場成績仍然可靠，主場7戰6勝1和，包括歐聯1比0小勝西甲球隊嘅基羅納，而數據上佢哋對西甲球隊勝率偏高，加上安歷基本身就係來自西甲，可作針對性部署，贏面更高。
馬體會換血期表現麻麻
另邊廂，馬體會今季簽入祖利安艾華利斯，主帥施蒙尼又扶植自己細仔朱利亞諾上位，球隊進入換血期，導致成績出現大幅波動，佢哋上輪歐聯主場先以1比3輸畀法甲球隊里爾，今場對住級數更高嘅ＰＳＧ，輸波屬意料中事。文:邪神
百家贴士
